Kharabi ye nahi ke main gunnah karta hun,
Kharabi ye hai ke main inhein dhoney wali neekiyan kaam mein nahi laata. aur dil ko mustaqal aaludha rakhta hun.
Main dukhi ke dukh nahin bant'ta,
Mareez ki khairiyat nahi pochhta.
Zakhmi ko marham nahi deta.
Sadme se barasti aankh nahin ponchhta..
Yateem ke sar par hath nahin rakhta..
Main achha parossi to chahata hun lekin..., Achha parossi bann'a mere usoolo'n mein nahi.
Parossi ki bhook aur pyaas se iss darje ka be-garz ho chuka hun ke,
Uss ke hisse ki GAS bhi compressor ki madad se chheen leta hun. Jiss se uss ki chappati bhi nahi ban pati..
Main ajeeb hi makhlooq hun..
Rizq se bhi barkat ki buniyad par nahin qeemat ki buniyad par salook karta hun.
Main ghar mein bach jane wala khana kachre mein phenk deta hun aur restaurant ki bach jane wali 3 botiyan pack kara leta hun.
Main chaurahe par garhi ke sheeshe par dastak dene wale sawali ko " Gair Mustahiq" ki logic se jhaadh deta hun.. Aur bhool jata hun ke Qura'n Majeed to mustahaq aur aur mustahaq ki baat hi nahi karta. Wo to mustahaq nahin balke saayil ka lafz istemal karta hai aur mangane wala to saayil hi to hai.
Kya main zakwaat baant raha hun? Ke mustahaq ki tehqeeq karu?
Main talaaq yafta bachi ke dukh ti tab sununga jab usse haqarat se dekhna band karun..
Meri jahez list dekh kar bachiyun ke baap sahem jate hain aur bachiyan andheri raato'n mein surmaa aalud aansu'n se rooti hain.
Main ne baap ko papa aur maa ko mama to bana liya, Lekin unhein maa baap nahin bana saka.
Mujhe eid ke roz bhi bhai ka apne ghar aana gawarah nahi.
Main baap ki virasat mein se beheno ka hissa marne ki schemein bana raha hun.
Aur main hairaan hun ke meri aulaad meri farmanbardar kyun nahi?
Rishtey naatey kya.. aur insaan kyaa... Main to garmeeyun mein ghar ki beroni deewar par parindo ke liye paani bhi nahin rakhta.
Lekin rakhun bhi to kis ke liye?
Main ne jab se bach jane wali rotiyan aur uss ke zarre bhi tukre wale ko bechne shuru kiye hain parindon ne meri munderr par anna hi chhor diya hai.
Mujhe halke mein matt lena..!
Main dabbe ka qeemati doudh pee kar bara hua hun.
Meri jawani KFC aur McDonald's ka qarz hai.
Meri gaddi mein laga sound system 1,50,000 ka hai.
Main iPhone har 6 mahine bad badal leta hun.
Meri coffee ke mug mein decart ka aks ubharta hai to siggar ke dhuwein me baidigar ki sheba bal khati hai.
Main ne uloom e deeniya bhi tammam ke tammam parh rakhe hain.
Main itna barra sheikh al hadees hun ke mere liye waqf e imlaak aulaad ko meeras mein de dena halal ho chuka hai.
Main itna aala darje ka "Deendaar" hun ke dewbandi, Barelvi, Ahl e Hadis aur shia mein se jo bhi ej ho jaun, Baqi 3 mujh se allah ki pannah mangte hai.
Main masjid mein allah se sab kuch hone ka yaqeen aur makhlooq se kuch na hone ka yaqeen rakhta hun, Lekin apne clinic par Homeopathy se sab kuch hone ka yaqeen aur allopathy se kuch na hone ka yaqeen paa leta hun.
Kharabi ye nahi ke main gunnah karta hun,
Kharabi ye hai ke main inhein dhoney wali neekiyan kaam mein nahi laata. aur dil ko mustaqal aaludha rakhta hun.
