Rabtey..

 

Janti ho.. Iss mobile ki khasiyat kya hai?

Aaj jab bahut waqt guzar gaya hai main kuch mahine peechhe gaya tha aaj yun hi nazar padi.

Apne bag ke ek koney mein to aankh namm ho gayi...

Ye wo mobile hai jiss par ham kabhi ghanto'n baatein kiya karte the..

Jiss mein hazaro'n messages hain jo tumhare aur mere darmiyan rabtey ki taaza missal ho..

Jisse aaj ghanto'n messages ko parhta raha aur dhundta rha ke kahan mujh se galti hui hai.

Jo tum ne rabtey hi khatam kar diye? 

Magar yaqeen karogi?

Mujhe na apni chatting history me koyi aise messages mile, na tumhare receiving history mein..

Phir na jane bila jawaz tum ne taaluqaat ko khatam kyu kar diya..

Mujhe aaj ek aur baat ka ehsaas hua.

Ek message parha tumhara..

( KAHAN REH GAYE HO AAP?)

Ehsaas ye huwa... Jahan tum ne chhorda wahin reh gaya hun main aaj tak..

Iss qadar tum sakht dil nikli ek baar bhi pochhna gawarah nahi kiya ke kiss haal mein ho tum?

Jab ke main roozana kabhi shayer ki surat kabhi ghussa dikha kar kabhi pyaar jatla kar

Tum se rabta karne ki koshish karta raha hoon.

Tum ne bass ek baar pochha ke..., Kya chahte ho tum?

Main darr sa gaya aur reply mein NOTHING keh diya..

Jab ke main chahata hun beshak ham ek na hoon muhabbat mar bhi chuki ho hamare dilon se..

Jab bhi ham ek dusre se gahe ba gahe pochhte rahein..

Taa ke rooh ko taskeen mil sake.

 Mujhe tumhara to nahi maloom, 

Magar jab bhi kisi se sunta tha ya ab bhi kabhi tumhare baare mein sunta hun yaar labbo'n par na jane

kahan se nikalti hai..

ALLAH KHAIR KARE.. KHUSH RAKKHE TUMHEIN..

Mujhe ghussa zaroor hai tum par...

Magar Dukh zara bhi nahi..

Isliye ke mere naseeb mein allah ne yahi likha tha.

Aakhir mein bass itna hi kehena chahunga...

Ke kabhi Fursat mile to..

Haal poochh liya karo... Jinhein behaal kardiya hai.

Muhabbat Ki Chhaun Nafrat Ki Dhoop

in Sad Poetry leave a reply posted by Readit Magzine

Dil todna bahut bura hota hai na?

Main ne ye bhi gunnah kiya hai. Main ne uss ko torda taa ke woh phir se kabhi na tootne ke liye jud sake.

Muhabbat mein to bahut taqat hoti hai na?

Ye to kamzoor se kamzoor insaan ko bhi bahadur, Be-missal bana deti hai.

Lekin, Meri muhabbat to uss ki taaqat banne ke bajaye uss ki kamzori ban gayi thi.

Mujhe khoney ka darr uss ki raato'n ki neendein uda raha tha.

Uss ki sochne samajhne ki taaqat salab kar raha tha.

Mere naam ka nasoor uss ke andar ko khaye jaa raha tha.

Mein uss ke liye aisa zakham ban gayi thi jiss par namak chhirak kar koyi bhi usse tarpa sakta tha.

Mere sath na honey ki khilash uss ka sukoon gharat kar rahi thi aur agar main uss ki ho jati to mujhe paa kar khoney ka khauf usse dehlaye rakhta.

Kabhi kabhi muhabbat rahat dene ke bajaye zaher bann jati hai,.

Jo rafta rafta aap ko andar se khokhla bana deti hai.

Jiss tarah muhabbat mein taaqat hoti hai... Ussi tarah nafrat bhi apni quwat mein baa kamaal hoti hai.

Jo rah e muhabbat mein khottey ho jate hain na..

Wahi raste nafrat wo adawat se paar kiye jaa sakte hain.

Iss liye main ne usse muhabbat ke nagar se nikaal kar nafrat ke sahera mein dhakeel diya.

Ab wo mujh se shadeed nafrat karta hai.

Main ne uss ka dil tor kar usse sambhalne ke liye nafrat ki besakhi thamma di.

Ab wo iss tanafur ke bayaabaan mein girte parte aakhir koyi nakhlistaan khooj hi nikaale ga.

Apne rezza rezza huwe wajood ko phir se ek mazboot shakhs ke saanche mein dhaal sake.

Abb usse kisi ki judai ka andesha nahi satayega..

Kissi ke door jane ka gham usse hoola nahi sake ga.

Woh nafrat ki seerhi par qadam rakh kar bala khauf kamiyabi ki manzil tak pahunch payega.

Main apni souch mein galath bhi ho sakti hoon..

Magar mujhe khushi hogi ke meri muhabbat na sahi magar mere liye uski nafrat uss ke liye arooj ka zariya ban paayegi.

Kyun ke mujhe uss ki sukh deti khushi bann'a tha..

Magar main tou usski dukhti ragg ban baithi thi..